Метеоролозите во Шпанија го потврдија највисокиот дневен температурен рекорд од почетокот на годината, откако живата достигна 45,7 степени Целзиусови.
Оваа екстремна жештина беше забележана денеска во градот Ел Гранадо, во јужна Андалузија, на границата со Португалија, соопшти државната метеоролошка служба АЕМЕТ.
Ова исто така го надмина претходниот рекорд за ден во септември, поставен во 2016 година во градот Монторо, исто така во Андалузија. Податоците сè уште се привремени.
Се очекува да остане премногу топло и во септември, со температури од околу 40 степени, за време на викендот и следната недела – особено во долините на реката Ебро и на југот.
Дури и на туристичкиот остров Мајорка, на почетокот од неделата не можат да се исклучат температури до 36 степени. Експертите сметаат дека климатските промени предизвикани од човекот придонесуваат топлотните бранови да стануваат поинтензивни, подолги и почести.
АЕМЕТ годинава регистрираше вкупно четири топлотни бранови во Шпанија, сите од јуни. Службата класифицира топлотен бран како таков само ако периодот на жештина трае најмалку три дена, не е ограничен на локална област и температурите се значително над нормалниот просек.
Жештината што ја зафати Шпанија речиси цело лето, се карактеризираше со таканаречени „тропски ноќи“ – со температури до 30 степени – кои беа особено проблематични за луѓето. Често, дури и капењето во Медитеранот не успеваше да биде освежувачко, пренесе ДПА. Крај брегот на Мајорка, во август беше забележана рекордна температура на водата од над 33 степени.