Она што до вчера изгледаше како холивудско сценарио за филм со ајкули, денес станува сурова реалност. Најновата студија објавена во списанието Environmental Pollution открива дека ајкулите на една од најпопуларните туристички дестинации, Бахамите, се позитивни на кокаин, кофеин и силни лекови против болки.
Истражувачите од Универзитетот во Парана останаа занемени откако анализите на крвта кај дури една третина од испитаните ајкули покажаа присуство на опасни наркотици и фармацевтски супстанции.
„Проблемот повеќе не е само пластиката. Ајкулите сега внесуваат супстанции кои директно влијаат на нивниот мозок и однесување. Ова е првпат да потврдиме вакво загадување во овој регион“, вели Наташа Восник, водич на истражувањето.
Научниците предупредуваат дека оваа појава, освен што го уништува морскиот екосистем, може да има и сериозни економски последици по туризмот, доколку ајкулите станат непредвидливи поради влијанието на дрогата.