Италијанска инфлуенсерка со руско потекло, Јулија Бурцева (38), починала по естетска интервенција извршена во приватна клиника во Москва, а случајот е предмет на истрага од страна на надлежните органи.
Смртта на Бурцева, која починала на 4 јануари, ја вознемири јавноста, пренесува „Daily Mail“. Според руските медиуми, таа се подложила на популарна естетска процедура за зголемување на задникот. Кратко по интервенцијата нејзината здравствена состојба нагло се влошила, по што итно била пренесена во болница, каде што лекарите констатирале смрт. Како можна причина за смртта се наведува анафилактичен шок.
Московскиот истражен комитет соопшти дека е покрената кривична постапка поради сомнеж за предизвикување смрт од небрежност, поврзана со неправилно извршување на професионалните должности.
„Истражителите се на местото на настанот, а медицинската документација ќе биде одземена. Наложени се низа форензички вештачења“, стои во официјалното соопштение.
Во фокусот на истрагата е приватната клиника „Елмас“, каде што била извршена интервенцијата, со цел да се утврди дали имало пропусти во медицинската постапка.