Шаховскиот клуб Алкалоид ја освои 28. титула државен првак на Македонија во екипна конкуренција, продолжувајќи ја доминацијата со 14-та шампионска титула по ред.
Во последното коло Алкалоид убедливо го совлада ШК Гостивар со 5,5:0,5 и првенството го заврши со максимални 18 бода од девет кола. Со тоа клубот стигна до 28 титули во 34 настапи по осамостојувањето на државата.
Најголемиот товар во текот на првенството го понесоа ИМ Емил Ристески, ИМ Филип Панчевски, ИМ Тони Лазов и ИМ Дејан Стојановски, заедно со велемајсторите Звонко Станојоски, Трајко Недев и Драгољуб Јаќимовиќ. На првите две табли настапуваа и засилувањата од Србија, велемајсторите Александар Инѓиќ и Велимир Ивиќ.
Најуспешен поединец во тимот беше Тони Лазов со 7,5 бода од осум партии, пред Дејан Стојановски со 6,5 од седум и Емил Ристески со 5,5 од шест партии.
„ШК Алкалоид доминира во екипниот шах во Македонија. Задоволен сум од прикажаното, сите го дадоа максимумот и во ниту еден меч не дозволивме да бидеме надиграни“, изјави капитенот Драгољуб Јаќимовиќ.
ШК Мулти Есенс го заврши првенството на четвртото место, иако во последното коло го победи ШК Прилеп со 5,5:0,5.
Алкалоид сезонава стигна и до двојна круна, бидејќи претходно шампионската титула ја освои и женскиот тим на клубот. Следниот голем настап ќе биде на Европскиот клупски куп во Црна Гора во средината на октомври.