Во рамки на денешната меѓународна конференција на Социјалдемократскиот сојуз на Македонија и Корчуланската висока политичка школа, на која беше промовирана „Скопската иницијатива“, социјалдемократските и прогресивни партии од регионот и Европа усвоија заедничка изјава со која се осудуваат дестабилизирачките активности, авторитарни влијанија и хибридните закани насочени кон соседните земји и демократските институции во регионот.
На прес-конференцијата Даша Шашиќ Шиловиќ, од Корчуланската висока политичка школа, посочи дека оваа изјава се однесува и на обидот од структурите поврзани со режимот на претседателот Вучиќ за дестабилизација на Црна Гора.
„Учесниците усвоија заедничка изјава со која ги осудуваат дестабилизирачките активности, авторитарни влијанија и хибридните закани насочени кон соседните земји и демократските процеси во регионот, вклучувајќи ги и неодамнешните обиди за дестабилизација на Црна Гора. Таквите дејствија се неспоиви со принципите на регионалната соработка, демократијата, владеењето на правото и вредностите на прогресивното европско семејство“, рече Шашиќ Шиловиќ.
Воедно таа додаде дека зајакнувањето на регионалната соработка на прогресивните сили е клучно за справување со авторитарните тенденции, корупцијата и сите форми на политичко влијание кои го забавуваат демократскиот развој и европската интеграција на земјите од регионот.
„Ги повикуваме сите демократски и прогресивни актери да застанат цврсто против сите обиди да се поткопа регионалната стабилност, демократските процеси и европската иднина на Западен Балкан“, рече Шашиќ Шиловиќ.
На прес-конференцијата Шашиќ Шиловиќ говореше и за развојот и значењето на регионалните прогресивни мрежи и нагласи дека тие се создадени како платформи за дијалог и соработка меѓу прогресивните сили од регионот и нивните европски партнери, со јасна цел да придонесат кон развојот на демократијата и да се спротивстават на заканите што ја поткопуваат европската перспектива на државите.
„Нашата цел беше да придонесеме за развојот на демократијата, да се спротивставиме на авторитарните тенденции, на антидемократските практики и на штетното влијание на корупцијата и екстремната десница, кои ги поткопуваат институциите, експертскиот потенцијал и европската перспектива на нашите држави. Токму затоа ги здруживме силите за да ја зајакнеме регионалната соработка, да ги поддржиме позитивните демократски процеси и да ја поттикнеме европската интеграција на регионот. Нашата цел не е само да станеме дел од Европската Унија, туку и активно да придонесеме за посилна и пообединета Европа“, рече Шашиќ Шиловиќ.
Притоа, таа нагласи дека „Скопската иницијатива“ претставува потврда на заедничката посветеност на прогресивните актери кон демократските вредности, регионалната соработка и европската иднина на Западен Балкан.
„Денешната средба е значајна затоа што ја потврдува нашата посветеност на регионалната соработка, демократските вредности и европската иднина на Западен Балкан“, рече Шашиќ Шиловиќ.