Шест пратеници од Бугарија денеска присуствуваа на рочиштето во Основниот суд во Кочани во судскиот процес против 23-годишната Ива Михаилова, која има македонско и бугарско државјанство.
Михаилова е обвинета за кривичното дело „Тешки дела против безбедноста на луѓето и имотот во сообраќајот“, по сообраќајна несреќа што се случила во октомври минатата година. Во несреќата загинало едно лице, а неколку други биле повредени, меѓу кои и Михаилова. Таа ја отфрла вината и тврди дека несреќата не настанала по нејзина вина.
Случајот предизвика реакции во Бугарија откако Основниот суд во Кочани го одби нејзиното барање да ѝ бидат вратени личните документи за да може да продолжи со лекување во Бугарија. Судот образложил дека не биле доставени лекарски мислења дека таквото лекување не може да се спроведе во Македонија, а Апелацискиот суд во Штип на 20 август ја потврдил одлуката.
По случајот реагираше и бугарското Министерство за надворешни работи, кое побара Михаилова да добие навремена и соодветна медицинска грижа.
На рочиштето присуствуваа пратеници од ГЕРБ, Прогресивна Бугарија и „Демократска Бугарија“, кои најавија дека ќе го следат текот на постапката и ќе ја информираат бугарската јавност.
Во Софија денеска беше организиран и протест пред Амбасадата на Македонија во знак на поддршка за Михаилова. За случајот двапати се огласи и бугарското Министерство за надворешни работи, а бугарската претседателка Илијана Јотова најави дека прашањето ќе го отвори и на средба со генералниот секретар на Советот на Европа во Стразбур.