Охридскиот рамковен договор е институционална одговорност и стандард што треба да продолжиме да го градиме секој ден, а не само документ од нашата историја, порача министерот за правда Јетон Шасивари по повод 25-годишнината од неговото потпишување.
Тој посочи дека одбележувањето на овој јубилеј на свечената седница на Владата претставува потсетување на историскиот момент со кој земјата тргна по патот на мирот, стабилноста и соживотот, но пред сè значи одговорност за иднината.
За мене, правдата не може да биде селективна. Еднаквоста не смее да остане само принцип на хартија. Тие мора да бидат дел од секојдневното функционирање на државата и од довербата на секој граѓанин во институциите – истакна министерот за правда.
Шасивари нагласи дека пораката по четврт век од потпишувањето на договорот е целосно јасна.
Иднината на земјата се гради врз почитувањето, еднаквоста, владеењето на правото и достоинството на секој граѓанин – додаде тој.
Според него, обврска на сите институции е Договорот да не се третира како завршено поглавје, туку како дел од континуиран процес за градење демократска, праведна и еднаква држава.
25 години мир. 25 години одговорност. Една заедничка задача: да изградиме поправедна иднина за сите! – заклучи Шасивари.