Републичкиот совет за безбедност на сообраќајот на патиштата, во соработка со Министерството за внатрешни работи, денеска започнува национална превентивна кампања со цел зголемување на безбедноста на пешаците во сообраќајот. Кампањата опфаќа низа активности, вклучувајќи едукативни содржини, јавни настани, работилници, медиумски пораки и теренски акции, со посебен фокус на правилно користење на пешачките премини, почитување на сообраќајната сигнализација и внимателно движење во урбаните средини.
- Пешаците се една од најранливите категории учесници во сообраќајот, а статистиката покажува дека потребна е континуирана едукација и подигање на јавната свест. Со оваа кампања сакаме да поттикнеме одговорно однесување, поголема внимателност и меѓусебна толеранција помеѓу возачите и пешаците, велат од РСБСП.
Во рамки на кампањата ќе се одбележи и „Недела на пешаците“, која ќе трае од 1 до 7 април, при што во соработка со МВР ќе се организираат превентивно-едукативни работилници за пешаците. Настаните имаат за цел да ги информираат и едуцираат граѓаните за безбедното однесување на улица и значењето на правилното користење на пешачките премини.
Од Советот апелираат до возачите да ја прилагодат брзината, да бидат особено внимателни во близина на пешачки премини и секогаш да им дадат предност на пешаците.
- Ги повикуваме и пешаците да ги почитуваат правилата за безбедно преминување на улица, да користат обележани премини и да останат внимателни, особено при намалена видливост. Посебен апел упатуваме за избегнување користење на слушалки, мобилни телефони и други електронски уреди додека се движат низ сообраќајот, бидејќи нивното внимание се намалува и се зголемува ризикот од незгоди, се наведува во соопштението.
Републичкиот совет за безбедност на сообраќајот потенцира дека безбедноста во сообраќајот е заедничка одговорност.
- Само со совесно и одговорно однесување можеме да придонесеме кон намалување на сообраќајните незгоди и создавање побезбедна средина за сите граѓани. Да не заборавиме: СЕКОЈ ЖИВОТ Е ВАЖЕН, потенцираат од Советот.
Советот најавува дека ќе продолжи со активна работа на унапредување на сообраќајната култура и заштита на сите учесници во сообраќајот, со цел создавање побезбедни улици и градови за сите граѓани.