Врсничкото насилство може да запре само со заеднички ангажман на институциите, наставниците, заедницата, но пред сѐ со поголема грижа и посветеност на родителите во воспитувањето на децата. Ова го нагласи министерката за образование и наука Весна Јаневска на едукативниот панел за родители одржан денеска во општина Гази Баба.
Министерката се осврна на неодамнешните немили настани и посочи дека насилството е сериозен аларм за целото општество.
„Последниот случај на врсничко насилство покажа деца со недостиг на емпатија и со изобличени вредности. Едни се изживуваат врз дете, а други стојат настрана, снимаат и се забавуваат, наместо да му помогнат и да го заштитат. Ова насилство е аларм за целото општество. Тоа е плод на недостиг на воспитна врска меѓу родителите и децата“, рече Јаневска.
Таа најави ригорозен системски одговор кон оваа појава и откри дека веќе разговарала со министерот за внатрешни работи.
„Одговорност мора да има и за родителите. Разговарав со министерот за внатрешни работи, ќе следат санкции за сите инволвирани и за нивните родители. Најчест причинител на врсничко насилство е семејното насилство и занемарувањето на децата“.
Во моментов во собраниска процедура се законски измени со кои се предвидуваат парични казни за родителите и старателите на децата кои извршиле врсничко насилство во училиште.
За надминување на состојбите, Министерството за образование веќе презема низа практични мерки на терен со цел поголема безбедност во објектите.
Зајакнати се стручните служби во училиштата, вратени се дежурствата на наставниците во ходниците и дворовите за време на одморите, а изработени се и посебни прирачници за справување со физичко и сајбер насилство.
Дополнително, преку обуки во 30-тина општини, стручните соработници во соработка со МВР и Комората на психолози се обучуваат навреме да препознаат семејно насилство преку однесувањето на учениците.