По речиси две децении, правилата за квалитетот на течните горива се менуваат со нова уредба која воведува современи стандарди, поголема контрола и појасни услови за сите учесници на пазарот.
Од Министерството за енергетика, рударство и минерални суровини информираат дека новата уредба го заменува досегашниот Правилник за квалитет на течните горива, кој се применуваше речиси 19 години.
Со новото решение се утврдуваат видовите и карактеристиките на течните горива што може да се продаваат на домашниот пазар, начинот на проверка и следење на нивниот квалитет, како и обврските на компаниите што учествуваат во пазарот на сурова нафта, нафтени деривати и горива за транспорт.
Според Министерството, новата регулатива треба да обезбеди еднакви услови за сите компании, да го намали просторот за злоупотреби и да придонесе за пофер конкуренција.
„Со новата уредба се воспоставуваат јасни и современи правила за тоа какви течни горива може да се пласираат на домашниот пазар, како ќе се утврдува нивниот квалитет и како ќе се следи нивното почитување. За граѓаните тоа значи поголема сигурност дека горивата што ги користат ги исполнуваат пропишаните стандарди“, велат од МЕРМС.
Од ресорното министерство додаваат дека примената на повисоки стандарди за квалитет на горивата ќе придонесе и за намалување на штетните емисии и подобрување на заштитата на животната средина.
Министерката за енергетика, рударство и минерални суровини, Сања Божиновска, оцени дека новата уредба претставува важна реформа во енергетскиот сектор.
„По речиси 19 години, ја заменуваме застарената регулатива со нова уредба, која носи јасни правила и стандарди. Нашата цел е граѓаните да имаат поголема сигурност во квалитетот на горивата, компаниите што работат законски да бидат заштитени од нелојална конкуренција, а пазарот да функционира според еднакви правила“, изјави Божиновска.
Со новата уредба, Министерството продолжува со спроведувањето на новиот Закон за енергетика и усогласувањето на регулативата со современите стандарди, со цел поголема транспарентност, правна сигурност и подобро уреден пазар на течни горива.