Судскиот совет на Република Северна Македонија денеска ќе ја одржи својата 548. седница, на која една од клучните точки ќе биде изборот на претседател на Основниот кривичен суд Скопје.
Пред членовите на Советот најпрво ќе се најде извештајот со предлог-листата на кандидати за раководната функција, по што ќе следува донесување на конечната одлука за избор на нов претседател на судот.
На дневниот ред се и измени и дополнувања на Годишната програма за работа на Судскиот совет за 2026 година, како и повеќе кадровски прашања, меѓу кои избор и разрешување на судии-поротници и формирање комисии што ќе постапуваат по барања за утврдување одговорност на судии и претседатели на судови.