Одлуките на меѓународните судови мора да се почитуваат, порача СДСМ во реакција на првостепената пресуда на Специјализираните совети во Хаг, со која Хашим Тачи и уште тројца обвинети се прогласени за виновни за воени злосторства.
Од партијата посочуваат дека има можност за жалба и оти судскиот процес сè уште не е завршен. Сепак, како што наведуваат, принципот мора да биде ист – судските одлуки да се почитуваат и да не се поттикнуваат тензии и поделби.
„СДСМ не се меша во работата на судот. Не кроиме пресуда според коалиција, нација или моментален интерес. Ако судот донел одлука за некој дека е виновен – тогаш тоа треба да се прифати, додека повисок суд не каже друго“, се наведува во соопштението.
Од СДСМ додаваат дека Хашкиот трибунал судел и во случајот со Ратко Младиќ, кога, како што велат, ставот бил дека пресудата мора да се почитува.
Во реакцијата се критикуваат и изјавите на претседателот на Собранието, Африм Гаши, кои од СДСМ ги оценуваат како несоодветни. Според партијата, не станува збор за пресуда против албанскиот народ или против правото на Косово на слобода, туку за судска одлука за поединци.
„Законот не се бира по нација“, порачуваат од СДСМ, додавајќи дека истиот принцип треба да важи и во Северна Македонија.
Од партијата истакнуваат дека во земјава, според нив, има мешање во работата на судството и обвинителството и политички притисоци врз правосудството, повикувајќи се и на наводи во извештаите на Европската комисија.
„СДСМ ќе ја почитува одлуката на судот и ќе повторува едно: никој не е над законот. Ни таму. Ни тука“, се наведува во соопштението.