СДСМ денеска обвини дека Владата подготвува отворање на повеќе нови рудници и дека, како што тврдат од партијата, природните ресурси на државата се ставаат во функција на туѓи бизнис интереси.
На прес-конференција, портпаролката Богданка Кузеска посочи дека станува збор за пет рударски проекти – Иловица–Штука, Казандол, Плавица, Кадиица и Луке, како и за планирани геолошки истражувања на Кожув.
Од СДСМ дополнително реагираат и на најавите за можен рудник за антимон. Кузеска тврди дека јавноста нема доволно информации за локацијата, резервите, инвеститорите и можните последици врз животната средина и локалното население.
Опозициската партија ги поврзува овие проекти и со најавените инвестиции во дата-центри, оценувајќи дека Владата носи одлуки без доволна транспарентност.
Кузеска упати и критики за економската политика на Владата и состојбата во ЕСМ, обвинувајќи дека приоритет им се дава на приватни бизнис интереси наместо на јавниот интерес.
Од СДСМ најавија дека ќе се спротивстават на плановите за отворање на рудници и дека заедно со граѓаните ќе бараат тие проекти да бидат стопирани.