Тешката здравствена состојба во Гостивар со речиси четири илјади пациенти за само неколку дена претставува реална криза, а не ширење дезинформации, обвинуваат од опозициската СДСМ. Според реакцијата на партијата, тврдењата на владејачката партија дека опозицијата сее паника се целосно неосновани во услови кога болничките капацитети се преполни, а водата од водоводот е прогласена за небезбедна дури и за техничка употреба. Од СДСМ соопштуваат дека институциите на власта реагирале со задоцнување бидејќи алармните системи за предупредување затаиле во клучните моменти.
Како што посочуваат од опозицискиот табор, наместо преземање политичка и морална одговорност, надлежните функционери се обидуваат вината да ја префрлат на друг. Од партијата подвлекуваат дека во земјите од Европската Унија ваков здравствен инцидент веднаш би резултирал со истраги и кривични пријави од страна на обвинителството.
Од СДСМ преку официјално соопштение изнесоа остри критики за справувањето со епидемијата:
„ВМРО-ОКГ деновиве тврди дека СДСМ шири дезинформации и паника за водата, се наведува во соопштението од СДСМ, што МИА го пренесува интегрално. Во Гостивар ситуацијата е катастрофална. За само неколку денови има речиси 4.000 пациенти. Болницата е преполна. Водата сè уште не е безбедна ниту за техничка употреба. Ова е „дезинформација“? Додека граѓаните стојат во редови за флаширана вода и полнат болнички ходници, ВМРО-ОКГ се занимава со обвинувања за паника. Реалноста е јасна: Илјадници заболени. Вода што не смее да се користи ниту за миење. А тие сè уште зборуваат за „дезинформации“.“
Во продолжение од партиското соопштение, СДСМ директно ги прозива премиерот и ресорниот министер за здравство за изостанокот на навремена реакција:
„Граѓаните во Гостивар не паничат. Тие се разболеа затоа што „црвените светла“ на Мицкоски и Клековски се вклучија предоцна. Толку правдања и префрлувања, а „црвеното светло” на Мицкоски и Клековски сè уште не работи Деновиве организираната криминална група ВМРО ги убедува граѓаните дека за труењето на Македонија е виновен некој друг. Сè додека министерот за здравство Клековски конечно не призна дека не реагирале навреме – затоа што не го виделе алармот. И повторно: никој од Министерството, никој од институциите не превзема одговорност. Ете како оваа организирана криминална група ВМРО се однесува кон граѓаните на Македонија. Никој не им е важен. Сами си се доволни.“
Од опозициската партија подвлекуваат дека отсуството на институционална разврска го покажало вистинското лице на домашниот правосуден систем:
„Ова е уште еден показател зошто ВМРО-ОКГ, а пред сè Мицкоски, не сака во Европска унија. Да се случеше ова во некоја земја-членка на ЕУ, сите веќе би биле пред обвинител да даваат изјави. И веќе би имале кривични пријави. Кај нас, за жал, правосудството е приватизирано. Тоа е во сопственост на Мицкоски и работи исклучиво на негов повик – од собраниската говорница, преку медиумите или по телефон. Граѓаните се трујат. А одговорност никој не презема.“