Опозициската СДСМ преку официјално соопштение упати остри критики до владејачката ВМРО-ДПМНЕ, обвинувајќи ја дека повиците за обединување се само изговор за застојот во реформските процеси. Од партијата порачуваат дека вистинскиот интерес на државата подразбира итни чекори на европскиот пат, а не изолација.
Во соопштението јавно се поставува прашањето за мотивите зад владините повици до јавноста и опозицијата.
„ВМРО-ОКГ не повикува на обединување на граѓаните, туку бара алиби за сопственото неисполнување на реформите. За што да се обединиме? За криминал и корупција? За блокада на патот кон ЕУ? За изолација на Македонија? Може да ги исполни реформите и да ги внесе малцинствата во Уставот, а ние од СДСМ ќе го поддржиме тоа. Тоа би било вистинско обединување – во интерес на граѓаните на Македонија и во интерес на европската иднина на државата.“
Од опозицијата директно го прозваа премиерот Христијан Мицкоски, потсетувајќи го на роковите што самиот ги најавил.
„СДСМ ќе поддржи сè што е во интерес на граѓаните, но нема да даде алиби за неисполнување на тоа што Мицкоски лично го вети до 1. Јуни. Мицкоски, уште 12 дена остануваат до уште едно признание – дека организираната криминална група ВМРО всушност не сака во ЕУ. За сето ова не му е потребен СДСМ, како што не му беше потребен ни за укинување на техничката влада… Доста веќе лаги и манипулации. Граѓаните го гледаат тоа јасно. Реформи сега. Малцинства во Уставот сега. Европа сега.“