СДСМ го обвини премиерот Христијан Мицкоски дека процесот околу најавените инвестиции во дата-центри не е доволно транспарентен и побара Владата да ги објави имињата на потенцијалните инвеститори, како и анализите за нивното влијание врз водните и енергетските ресурси.
Од опозициската партија реагираат на изјавите на Мицкоски дека се разговара со пет до шест инвеститори, оценувајќи дека јавноста треба да знае со кого се водат разговорите и под кои услови.
„Зошто не се објавуваат нивните имиња? Со кого се договара Мицкоски ‘под радарот’?“, прашуваат од СДСМ.
Партијата бара одговори и за тоа колку вода, електрична енергија и земјиште би им биле потребни на потенцијалните дата-центри и дали нивното функционирање би можело да има последици врз снабдувањето на населението и земјоделството.
Од СДСМ предупредуваат дека дата-центрите можат да бидат големи потрошувачи на вода и електрична енергија и дека пред носење одлуки мора да бидат објавени детални проценки за расположливите ресурси и можните трошоци.
„Македонија нема ресурси за експерименти зад затворени врати, особено не со водата“, наведуваат од партијата.
Според СДСМ, прашањето е особено чувствително во услови кога дел од населението се соочува со проблеми со водоснабдувањето, а земјоделството зависи од достапноста на вода за наводнување.
Опозицијата бара и анализи за влијанието врз електроенергетскиот систем, оценувајќи дека јавноста мора да знае колкава моќност би барале планираните објекти, од каде ќе се обезбедува електричната енергија и дали тоа може да влијае врз цената што ја плаќаат граѓаните.
Од СДСМ велат дека не се против инвестиции во нови технологии, но инсистираат тие да бидат реализирани со целосна транспарентност и во интерес на државата.
„Инвестициите мора да бидат во интерес на Македонија, а не ресурсите на Македонија да се ставаат во функција на туѓи профити“, порачуваат од партијата, додавајќи дека водата, струјата и земјиштето се ресурси на граѓаните.