СДСМ жестоко реагира на изјавите на премиерот Христијан Мицкоски поврзани со департизацијата на јавната администрација, нарекувајќи ги „цинични“ и „лицемерни“. Според СДСМ, токму ВМРО-ДПМНЕ и неговото раководство се одговорни за досега невидена партизација на државните институции.
„Мицкоски ли најде да зборува за департизација на администрацијата? Па токму тој и ВМРО-ДПМНЕ се синоним за партизација на институциите“, наведуваат од СДСМ во соопштението.
Од партијата обвинуваат дека само во првите 15 месеци од мандатот, Владата на ВМРО-ДПМНЕ спровела системско уништување на институциите преку, како што велат, „брутална партизација“. Тие тврдат дека стручноста и компетентноста не се критериум при вработување, туку клучна е партиската книшка.
„Преку 700 огласи за вработување беа распишани само годинава – сите во функција на згрижување на партиски кадри и зголемување на партиската војска на ВМРО-ДПМНЕ“, посочуваат од СДСМ.
Како примери за партиско и роднинско вработување, СДСМ ја спомнува фамилијата Андоновски, каде, според партијата, таткото Љупчо е советник, братот Игор е началник, а Стефан Андоновски – министер, сите ангажирани во владата предводена од Мицкоски. Дополнително, се наведува и дека сестрата на министерот за култура Љутков е вработена во Музејот во Велес токму во овој период.
„Нема институција која остана недопрена од партиските вработувања. Ова особено се засили во периодот пред локалните избори“, обвинуваат од СДСМ.
Од таму порачуваат дека Мицкоски е „последниот што може да зборува за ефикасен јавен сектор и департизација“, оценувајќи дека неговата влада само ја продлабочува партизацијата и клиентелизмот во државата.