Новите статистички податоци објавени од Евростат предизвикаа остри реакции во домашната јавност, отворајќи нова политичка дебата за економските политики и реалниот животен стандард во државата. Опозициската СДСМ со реакција се огласи по повод европските извештаи, обвинувајќи ја актуелната владина структура за несоодветни економски резултати и целосно заостанување зад земјите од регионот.
Според информациите презентирани од партискиот центар за комуникации, официјалните европски податоци покажуваат дека куповната моќ на македонските граѓани се наоѓа на самото дно на европската ранг-листа.
„Евростат објави поразителни бројки, го потврди дебаклот на Мицкоски: Македонија има најнизок животен стандард и најслаба куповна моќ во Европа. Евростат ја покажа суровата реалност за економската мизерија во која живеат македонските граѓани после две години Влада на Мицкоски и ВМРО. Зад Македонија нема друга земја, пред нас се Босна и Херцеговина, Турција, Црна Гора, Србија….“
Во своето соопштение, опозициската партија нагласува дека тврдењата за економски раст и напредок се во целосна спротивност со она што го покажуваат европските институции, додавајќи дека граѓаните секојдневно се соочуваат со егзистенцијални предизвици.
„Додека Мицкоски зборува за „трета економија во Европа“, „поголем раст од ЕУ“, и за „економско чудо“, Евростат ја покажува реалноста: Каква трета економија, какво економско чудо, Македонија е на дното. Евростат ја објави реалноста дека македонските граѓаните живеат полошо од сите граѓани во Европа. Тоа е економското чудо на Мицкоски – во факти. А тоа најдобро го знаат граѓаните на Македонија. Со Мицкоски сме заглавени на дното.“