Економските резултати на Владата предводена од Христијан Мицкоски се катастрофално лоши, а граѓаните се соочуваат со повисоки цени и сè потешко ги покриваат трошоците, се наведува во соопштението на СДСМ.
Од партијата тврдат дека дупката во ПИОМ достигнала една милијарда евра, дека инвестициите се на ниско ниво и дека долговите се зголемиле за четири милијарди евра.
СДСМ ја критикува и состојбата со буџетот, повикувајќи се на податоци од Министерството за финансии, според кои буџетскиот дефицит годинава ќе надмине 900 милиони евра, односно пет проценти од БДП.
Од партијата обвинуваат дека планираниот дефицит веќе е искористен, приходите потфрлаат и дека Владата најавува ново задолжување преку нов ребаланс на буџетот.
СДСМ истакнува дека, според нив, наместо економски резултати и инвестиции, Владата посегнува по националните ресурси, вклучително водата, рудата и земјиштето.
„Тоа не е економска стратегија, туку распродажба на Македонија“, се наведува во соопштението.
Од СДСМ заклучуваат дека економските политики на Владата предводена од Мицкоски се на штета на граѓаните и оценуваат дека „Мицкоски е економски армагедон за Македонија“.