Новиот државен јавен обвинител, Ненад Савески, денеска официјално ја презема функцијата, станувајќи деветти републички обвинител од независноста на Северна Македонија во 1991 година и 19-ти од 1945 година. Неговото именување вчера беше одобрено со 66 гласа „ЗА“.
-„Сакам да им се заблагодарам на моите колеги, судиите од Основниот кривичен суд Скопје, за сите убави моменти, како и на Владата која ме предложи и на пратениците кои ме поддржаа и изразија свои ставови“, изјави Савески.
Тој додаде дека ги повикува сите јавни обвинители на соработка, истакнувајќи дека нивната работа не почнува и не завршува со него:
-„Го познавам обвинителскиот состав, задоволен сум и верувам дека ќе ги исполнуваме очекувањата на граѓаните, во чије име и согласно Уставот постапуваме“, рече тој.
Савески нагласи дека политиката на политичките партии не е и нема да биде негов интерес:
-„Секој предмет има еднакво значење и нема да правам приоритети. Претпочитам да се водам според законските основи и регулативи кои важат за сите јавни обвинители – вчера, денес, утре и во иднина“, додаде Савески.
Досега работеше како судија во Основниот кривичен суд Скопје, а за функцијата беше предложен од Владата на 10 март. Во изборниот процес, позитивно мислење добија и други кандидати, меѓу кои Анита Тополова-Исајловска, Ленче Ристовска и Лидија Раичевиќ.
Савески е роден 1976 година во Гостивар и е магистер по казнено право. Има богато професионално искуство како судија, јавен обвинител и правен експерт, како и ангажмани во меѓународни проекти и домашни реформи во правосудството.