Американскиот претседател Доналд Трамп се огласи на својата социјална мрежа „Truth Social“ со став дека официјален Техеран покажува подготвеност за дипломатско решение на актуелните тензии. Според неговите зборови, „Иран всушност навистина сака да постигне договор“.
Истовремено, шефот на Белата куќа упати жестоки критики кон претставниците на домашната политичка сцена кои постојано ја доведуваат во прашање неговата стратегија во преговорите со Иран.
„Не разбираат ли овие „демократи“ и разни навидум непатриотски републиканци дека ми е МНОГУ потешко добро да си ја работам работата и да преговарам кога политичките платеници постојано и негативно „цивкаат“, на нивоа што не се видени досега, повторувајќи одново и одново дека треба да одам побрзо, или да одам побавно, или да одам во војна, или да не одам во војна, или што и да е? Само седнете и опуштете се, на крајот сè ќе испадне добро – секогаш е така!“, порача Трамп.
Во својата последна јавна објава, американскиот претседател одлучи да не ги коментира последните воени инциденти на Блискиот Исток. Тој не го спомена иранскиот напад врз цели во Кувајт, како ни одговорот во форма на американски воздушни напади врз позиции во Иран кои беа извршени во текот на викендот.
Од друга страна, воените структури веќе ја потврдија ескалацијата на терен. Централната команда на американската армија (CENTCOM) утрово излезе со официјална потврда дека се извршени нови воздушни напади врз цели на иранска територија.
Ова официјално соопштение од страна на Пентагон беше објавено само неколку минути откако властите во Кувајт соопштија дека земјата се соочила со напад. Веднаш по пријавувањето на инцидентот, во Кувајт беа активирани сирените за предупредување од воздушна закана од ракети и беспилотни летала