Коалицијата Вреди ќе раководи со вкупно шест министерства по најавената владина реконструкција, потврдија денеска од партиското раководство.
Станува збор за ресорите за животна средина, економија, правда, евроинтеграции, култура и односи меѓу заедниците, со кои во иднина ќе управува овој коалициски партнер.
Како што изјави денеска Беким Сали од Вреди, актуелен вицепремиер и министер за европски прашања, Министерството за здравство не е дел од овој пакет.
Во рамки на овие промени, веќе е извесно дека ќе има кадровски освежувања во два важни ресори, но конкретните решенија сè уште се усогласуваат.
Две нови имиња ќе има во Министерството за култура и Министерството правда, но се уште не е дефинирано кои ќе бидат тие.
Официјалните информации беа соопштени за време на настанот со кој коалицијата одбележува две години од работењето како дел од владината коалиција, каде Сали одговараше на новинарски прашања.
„Се уште нема финално име за правда и култура, тоа ќе бидат две нови имиња. Актуелните министри мислам дека перформираат добро во Владата, задоволни сме како Вреди и ќе продолжат понатаму. Здравство не е дел од пакетот, не е од нашите“, истакна Сали.
Тој појасни дека разговорите во рамки на мнозинството се во тек, но позициите за шесте наведени министерства се веќе фиксни.
Според Сали, се додека траат преговорите има отворени теми, но министерствата за животна средина, економија, правда, евроинтеграции, култура и односи меѓу заедниците, сигурно ќе и бидат доверени на Вреди.