Соединетите Американски Држави воведуваат опсежни санкции против Меѓународниот кривичен суд, соопшти денеска Стејт департментот.
Мерките ќе забранат трансакции со судот со седиште во Хаг, ќе ги прекинат неговите ресурси и сериозно ќе ја ограничат неговата способност за работа, соопшти департментот.
„Претседателот Трамп никогаш нема да дозволи Меѓународниот кривичен суд да им суди на Американци“, се наведува во соопштението, во кое МКС е опишан како „суд кој дејствува спротивно на правилата“, пренесе ДПА.
Соединетите Американски Држави никогаш не се приклучија кон МКС и ја отфрлаат неговата надлежност над американските граѓани, воениот персонал и политичките лидери.
Вашингтон претходно воведе санкции против поединечни судии и обвинители во судот, кој ги гони воените злосторства, злосторствата против човештвото и геноцидот.
Стејт департментот соопшти дека го одложил воведувањето санкции против самата институција во надеж дека Меѓународниот кривичен суд или неговите земји-членки ќе одговорат на загриженоста на САД, но ниту едните ниту другите не презеле суштински чекори за тоа.
Тој соопшти дека Вашингтон и натаму е отворен за дипломатско решение, но предупреди дека би можеле да следуваат дополнителни мерки.
„Или МКС ќе стави крај на своите закани, или ние ќе ставиме крај на МКС“, се наведува во соопштението, со предупредување дека Соединетите Американски Држави во спротивно ќе продолжат со кампањата за укинување на судот „цигла по цигла“.