Портпаролот на Кремљ, Дмитриј Песков, денеска предупреди дека одлуката на Европа постепено да се откаже од рускиот гас ќе доведе до пад на нејзиниот економски потенцијал и до намалување на конкурентноста на Европската Унија.
„На овој начин, Европа ќе обезбедува значително поскапи извори на енергија, што неизбежно ќе влијае на економијата и ќе ја намали конкурентноста. Ова само го забрзува процесот што веќе е забележан изминатите години – губењето на водечката позиција на европската економија“, изјави Песков, коментирајќи ја оценката на претседателката на Европската комисија, Урсула фон дер Лајен, дека ЕУ повеќе нема да зависи од рускиот гас.
Тој повтори дека европските држави, доколку целосно се откажат од рускиот гас, ќе мора да прибегнат кон значително поскапи алтернативни енергенси.
Советот на Европа денеска соопшти дека постигнал договор со Европскиот парламент за постепено укинување на увозот на руски гас до 2027 година, во рамки на стратегијата за намалување на енергетската зависност од Русија.
Според привремениот договор, увозот на течен природен гас (ЛНГ) и гас преку цевководи од Русија ќе се укинува по фази – целосната забрана за ЛНГ е предвидена до крајот на 2026 година, а за гасот преку цевководи до есента 2027 година.
Договорот треба формално да биде одобрен од Советот и Европскиот парламент за да стане правно обврзувачки.