Русија ќе се воздржи од напади врз Украина до 1 февруари, постапувајќи по директното барање на американскиот претседател Доналд Трамп. Оваа вест ја потврди портпаролот на Кремљ, Дмитриј Песков, појаснувајќи ги деталите околу тековните дипломатски напори.
Одложени нападите врз Киев
Според Песков, одлуката доаѓа по лична комуникација меѓу Вашингтон и Москва.
„Да, имаше личен апел од претседателот Трамп во кој тој го замоли претседателот Путин да се воздржи од напади врз Киев една недела, до 1 февруари, додека не се создадат поволни услови за преговори“, изјави Песков.
Средба Путин-Зеленски? Само под еден услов
Иако се шпекулираше за можна средба меѓу двајцата лидери, Кремљ демантира дека иницијативата потекнала од нивна страна. Песков појасни дека рускиот претседател не нудел средба, туку само одговорил на барањето на Киев.
„Зеленски побара средба и, всушност, Зеленски ја иницираше средбата. Како одговор, претседателот Путин му рече дека сме подготвени, но исклучиво во Москва“, нагласи портпаролот.
Динамиката на фронтот наспроти преговорите
Во однос на ставот на Украина дека нема да прави компромиси за Донбас и нуклеарната централа Запорожје, Кремљ останува на своите позиции. Песков кратко прокоментира дека „динамиката на фронтот зборува сама за себе“, со што сугерира дека воената состојба на терен ќе ја диктира преговарачката моќ.
Што содржи американскиот мировен план?
Викендов во Абу Даби се одржа првиот состанок на трилатералната работна група (Москва, Киев, Вашингтон). Иако деталите се чуваат во тајност, странските медиуми пренесуваат дека американската иницијатива вклучува сериозни отстапки:
- Целосна контрола на Москва врз Донбас и признавање на Крим како руска територија.
- Замрзнување на линиите во Запорожје и Херсон.
- Намалување на украинските вооружени сили за 50%.
- Забрана за распоредување на странски трупи и оружје со долг дострел.
Следната рунда преговори е закажана токму за 1 февруари, кога истекува договореното примирје.