Евроамбасадорот Михалис Рокас при денешната посета на Крушево изјави дека има видливо забрзување на реформскиот процес во Македонија во споредба со минатата година. Тој изрази оптимизам дека претстојниот извештај на Европската комисија ќе ги рефлектира овие позитивни промени.
Според него, во тек е подготовката на Годишниот извештај на ЕК, кој треба да биде финализиран на почетокот на есента.
„Годишниот извештај на Европската Комисија е во тек на подготвување и треба да се финализира до септември или во почетокот на септември. Јас сум убеден дека ова ќе биде извештај кој ќе покаже напредок, кога ќе се спореди со минатиот Извештај на ЕК“, истакна Рокас.
Евроамбасадорот потенцираше дека Европската Унија има блиска соработка со Владата и со министерствата со цел да се направи напредок во неколку клучни сфери.
Тој потсети дека крајот на јуни е клучниот рок до кој извршната власт мора да ги спроведе предвидените чекори и мерки од реформската агенда.