Министерот за спорт Борко Ристовски престојува во официјална посета на Азербејџан, каде што оствари билатерална средба со министерот за млади и спорт Фарид Гајибов. Во фокусот на средбата беше унапредувањето на односите меѓу двете земји во областа на спортот и создавањето конкретни механизми за долгорочна институционална соработка.
Како резултат на средбата, двете министерства потпишаа Меморандум за разбирање со кој се воспоставува широка рамка за размена на знаења, искуства и добри практики. Соработката ќе опфати спортска медицина, интегритет во спортот, управување со спортски настани, обука и размена на спортски кадри и експерти, адаптивен спорт, спорт за сите, спортски туризам и спорт во образовните институции.
Посебен акцент, информираат од Министерството за спорт, е ставен на поврзувањето на националните спортски организации, учеството на експерти и делегации на спортски настани во двете земји, како и на заеднички активности и размена на искуства во рамките на меѓународните спортски организации.
-Со потпишувањето на Меморандумот правиме конкретен чекор кон продлабочување на спортската соработка меѓу Македонија и Азербејџан. Создаваме нови можности за размена на знаења, експерти и искуства и за директно поврзување на нашите спортски организации. Добрата соработка се гради со конкретни чекори. Овој Меморандум е основа за директна, континуирана и практична соработка која треба да создаде нови можности за македонскиот спорт, истакна Ристовски.
Со Меморандумот, Македонија и Азербејџан поставуваат основа досегашните добри односи да прераснат во конкретна и континуирана соработка во спортот, со директни контакти меѓу институциите, федерациите и спортските професионалци.