Советничката во Општина Центар, Диана Ристовска Додевски, денеска упати остри критики до градоначалникот Горан Герасимовски и СДСМ, обвинувајќи ги за лошите услови за живот и инфраструктурниот хаос на улицата „Охридска“ во Маџир Маало.
Според неа, локалната власт свесно дозволува деградација на просторот во општината за задоволување на партиски и бизнис интереси.
„Улица „Охридска“ во Маџир маало, е само еден пример за тоа, како се работи во Општина Центар и во какви услови живеат Центарци. Герасимовски и СДС ако треба Центар ќе го направат и Бангладеш, само за да делат тендери и градежни дозволи на фирми блиски до Венко и Заев, за спас на партијата која оди кон сигурна пропаст“, посочи Ристовска Додевски.
Таа реагираше и на пасивноста на општинските инспекциски служби, тврдејќи дека граѓаните од овој дел на Центар со години се соочуваат со прашина и градежен шут на патот до своите домови.
Опозициската советничка посочи дека поради градежните активности е оневозможено нормалното движење на пешаците, мајките со детски колички и лицата со инвалидитет, кои се принудени да се движат по коловозот меѓу камионите и градежните машини.
Таа упати и јавен повик до градоначалникот Герасимовски итно да излезе на терен и да даде одговори пред жителите на Маџир Маало.
„Да дојде Герасимовски во Маџир Маало и да одговори зошто не беа доволно поплаките на Центарци, па се чекаше медиумите да објават, за тој да мора да испрати едно штуро соопштение дека било потребно геодетско мерење. Дојди Герасимовски, да ни објасниш дали треба и тука да пропадне тротоар и соседните објекти, за да преземеш нешто!“, изјави советничката.
На крајот од своето обраќање, Ристовска Додевски побара одговорност и оставка од првиот човек на Општина Центар.