Заменик-министерот за економија и труд, Марјан Ристески, при денешната посета на Универзитетот „Гоце Делчев“ во Штип, најави дека од почетокот на следната година државата ќе започне со сопствена пресметка на просечна потрошувачка кошничка. Оваа новина ќе биде разгледана на Економско-социјалниот совет закажан за 22 декември.
Според Ристески, оваа кошничка ќе послужи како основа за креирање на идните економски стратегии и заштита на животниот стандард.
„Од 1 јануари ќе се пресметува покрај синдикална минимална кошничка, ќе имаме и просечна потрошувачка кошничка на ниво на Република Македонија, која нас ќе ни користи како економија и Влада за понатамошни стратегии“, изјави Ристески.
Во пресметката ќе бидат вклучени цените на основните производи од најголемите маркети, земајќи ги предвид регионалните специфики и сезонското овошје и зеленчук. Министерот најави дека во иднина ќе се воведат и посебни кошнички за пензионери, како и за двочлени и трочлени семејства.