Државата тргнува во немилосрдна офанзива против нефер трговските практики на големите синџири маркети кои вештачки ги пумпаат цените на производите.
Нарацијата нѐ води кон најавениот итен состанок в понеделник на кој премиерот Христијан Мицкоски лично ќе им ја испорача последната опомена на дистрибутерите и трговците.
Претседателот на Владата открива дека веќе се подготвуваат законски решенија со кои финансиските санкции за прекршителите ќе бидат драстично зголемени:
„На почетокот на кризата имавме еден таков состанок. Сега во понеделник ќе имаме уште еден таков состанок… на којшто ќе испратиме силна порака во начинот на нивното однесување на пазарот. Истовремено, и законските зміни се при крај за усвојување, каде што казните се десеткратно зголемени за оние маркети коишто ќе се однесуваат нефер. Ќе ја засилиме и инспекцијата и контролите на терен.“
Зад кулисите на големите маркети со години се кријат разработени сметководствени шеми преку кои се уценуваат домашните производители.
Премиерот јавно ги охрабри сите добавувачи веднаш да ги пријават ваквите притисоци во инспекторатите за да може државата ефикасно да реагира:
„Се наоѓаат канали од страна преку разноразни услуги преку трети фирми да се фактурира таканаречен ројалити, што не е фер трговско однесување. Јас ги охрабрувам сите дистрибутери и производители тоа да го пријават за да можеме како држава да делуваме. Инаку не можеме да делуваме, затоа што кога ќе направите инспекција и кога ќе ги видите сметководствените книги, ќе видите дека сѐ е во ред, а преку трети и четврти прокси канали се наплаќа тој ројалити. Дали производот да е полево или подесно на полицата, тоа е веќе јавна тајна и сите го зборуваат тоа.“