Македонските аеродроми во првите шест месеци од 2026 година бележат значителен раст на бројот на патници и реализирани летови. Меѓународниот Аеродром Скопје и Аеродромот „Св. Апостол Павле“ Охрид заедно опслужиле 1.955.648 патници, што претставува зголемување од 28 проценти во однос на истиот период минатата година.
Во периодот јануари-јуни биле реализирани 13.167 летови, односно 7,6 проценти повеќе споредено со првите шест месеци од 2025 година.
Само во јуни, двата аеродрома опслужиле 374.714 патници, што е раст од 15,6 проценти во однос на истиот месец лани.
„Растот од 28 процентина бројот на патници во првите шест месеци од 2026 година претставува извонреден резултат и јасна потврда дека македонските аеродроми се наоѓаат на патека на силен и одржлив развој. Во воздухопловната индустрија, двоцифрен раст на патничкиот сообраќај е показател за успешна стратегија, зголемена доверба од патниците и атрактивност како дестинации за авиокомпаниите. Фактот што Меѓународниот Аеродром Скопје и Аеродромот Св. Апостол Павле Охрид заедно опслужија речиси два милиона патници за само шест месеци, истовремено бележејќи и раст од 7,6 проценти на бројот на летови е резултат на нашата посветеност за развојот на воздушната поврзаност, континуираното унапредување на услугите и успешната соработка со нашите партнери. Остануваме фокусирани на создавање нови можности за раст, проширување на мрежата на дестинации и обезбедување квалитетно патничко искуство, со цел македонските аеродроми да продолжат да ги надминуваат очекувањата и во наредниот период“, вели во пишана изјава Неџат Курт, генерален директор на ТАВ Македонија.
Според полугодишните статистички податоци на ТАВ Македонија, најфреквентна дестинација од Меѓународниот Аеродром Скопје е Истанбул, со двата аеродрома ИГА и Сабиха Гокчен и пазарен удел од 14,2 проценти. Следуваат Минхен Меминген со 4,5 проценти, Базел Милуз со 4,4 проценти, Дортмунд со 4,1 проценти, Цирих со 4 проценти и Франкфурт со 3,9 проценти.
Меѓу земјите со најголем број директни летови од Скопје предничат Германија со 28,5 проценти пазарен удел во вкупниот патнички сообраќај, потоа Турција со 18 проценти, Швајцарија со 9,3 проценти, Италија со 8,2 проценти и Шведска со 5,8 проценти.
Одделно гледано, Меѓународниот Аеродром Скопје во првите шест месеци од годинава опслужил 1.833.010 патници, што е раст од 28,6 проценти во однос на истиот период лани. На скопскиот аеродром биле реализирани 12.260 летови, што претставува зголемување од 6,5 проценти.
Аеродромот „Св. Апостол Павле“ Охрид бележи раст од 18,2 проценти, со 122.638 превезени патници во периодот јануари-јуни, додека бројот на летови е зголемен за 26 проценти, со вкупно 907 реализирани летови.