Министерството за здравство информира дека во државата се регистрирани четири лабораториски потврдени случаи на мали сипаници, од кои еден увезен, во време кога во Косово и Бугарија се во тек епидемии.
„Според проценката на Институтот за јавно здравје, ризикот од нови случаи е зголемен, но засега нема пошироко ширење на национално ниво. Сите заболени се невакцинирани, а две се бебиња кои поради возраста уште не можеле да бидат вакцинирани“, посочија оттаму.
Од МЗ додаваат дека епидемиолошките служби ги идентификуваат и следат сите контакти. На сите јавни и приватни здравствени установи им бил доставен протокол за рано препознавање, тријажа и изолација, а градинките и училиштата добиле упатство за превентивни мерки.
„Малите сипаници се едно од најзаразните заболувања, но од нив можеме да се заштитиме. Две дози МРП вакцина се најсигурната заштита. Ги повикувам родителите да го проверат картонот за вакцинација на децата, а возрасните кои не се сигурни дали се вакцинирани да се консултираат со матичниот лекар. Со тоа ги штитиме и бебињата, кои се премали за вакцина“, изјави министерот за здравство Сашо Клековски.
Министерството ги повикува граѓаните: да ги надоместат пропуштените дози МРП вакцина во најблискиот вакцинален пункт; при висока температура, кашлица, црвени очи и осип да останат дома и прво телефонски да се јават на матичниот лекар, наместо да одат директно во чекалница; ако биле во контакт со заболено лице, веднаш да се јават на матичниот лекар или во Центарот за јавно здравје и да не праќаат болно дете во градинка или училиште.
Порачаа дека Министерството, Институтот за јавно здравје и центрите за јавно здравје континуирано ја следат состојбата и ќе ја информираат јавноста за секоја промена.