Заклучно со 29 септември 2026 година, во Македонија се регистрирани вкупно 71 случај на западно-нилска треска, од кои 66 се потврдени, а пет се веројатни, покажува последниот извештај на Институтот за јавно здравје (ИЈЗ).
Според податоците за географската распределба, најголем дел од заболените се од Скопје (63 случаи), додека останатите се регистрирани во Велес, Кавадарци, Куманово, Свети Николе и Тетово. Од вкупниот број заболени, 52 се машки, а 19 се женски лица, со просечна возраст од 66,5 години, при што најзасегнати се лицата на возраст над 60 години.
Заболените со невроинвазивна форма биле хоспитализирани, а во текот на годината се регистрирани 10 смртни случаи кај пациенти со коморбидитети, со просечна возраст од 71 година. Во текот на последната недела (од 23 до 29 септември) пријавен е еден нов случај од Росоман и еден нов смртен исход од Скопје.