Реал Мадрид пушти денеска во продажба во своите официјални продавници ограничено издание дресови со името на папата Лав Четиринаесетти по цена од 195 евра, откако поглаварот на Римокатоличката црква обелодени дека е навивач на Кралскиот клуб.
Во горниот дел на позадината од белиот дрес е испишано името на папата на шпански јазик „León“, а подолу бројката „XIV“.
Шпанските медиуми јавија дека првиот човек на Реал, Флорентино Перез (79), кој во неделата доби нов претседателски мандат, попладнево официјално ќе му го подари дресот на папата, кој е во посетата на Шпанија и ќе се сретне со верниците на стадионот „Сантијаго Бернабеу“.
-Би сакал да го поздравам Лав Четиринаесетти. Во авионот со кој се упати од Рим до Шпанија, тој рече дека е навивач на Реал Мадрид, што е голема чест за нас. Добредојдовте, Ваша Светост, рече Перез на предизборниот митинг во саботата.