ВМРО-ДПМНЕ е убедливо прва, и има огромна победа во првиот круг на изборите за избор на градоначалник во општина Брвеница. Ова го напиша премиерот Христијан Мицкоски на Фејсбук.
-Нашиот кандидат Стојанче Радичевски освои огромно мнозинство на гласови, а разликата во однос на нашите конкуренти од СДС е поголема од 4 спрема 1.
Честитки за граѓаните на Брвеница што се одважија и овозможија уште една голема победа пред се за нив а потоа и за Македонија, што е јасен показател дека народот е со ВМРО-ДПМНЕ и дека народот одбира прогрес, единство и исправна борба за иднината.
Сакам најнапред да им се заблагодарам на сите граѓани кои денеска го остварија своето право на глас. Благодарност и до сите кои беа вклучени во организацијата и спроведувањето на изборниот процес.
Сакам да му честитам на нашиот кандидат, на сите кои работеа посветено во изминатите недели и, пред сè, на граѓаните коишто ни ја дадоа својата доверба.
Пред Брвеница е уште една важна одлука. На 1 ноември граѓаните повторно ќе имаат можност да одлучуваат за иднината на својата општина. Ќе побараме поддршка од сите граѓани на Брвеница. Во овој изборен процес влеговме со јасна програма, со конкретни проекти и со цврста определба да ја продолжиме започнатата работа. И со тие цели продолжуваме и понатаму!
Победата е огромна, но и нашите обврски за оваа општина се огромни. Со конкретни проекти. Со одговорност. Со почит кон секој човек. За една Брвеница за сите. Да ја сочуваме силата на единството. Одиме на вкупна победа!, напиша Мицкоски на Фејсбук.
За потсетување, кандидатот на ВМРО-ДПМНЕ и Коалицијата „Твоја Македонија“, Стојанчо Радичевски, освои најмногу гласови на предвремените избори за градоначалник на Општина Брвеница, покажуваат обработените податоци од сите 24 избирачки места.
Според објавените резултати, Радичевски освоил 2.943 гласови, односно 38,90 отсто од вкупниот број гласачи кои го оствариле своето право на глас.
Втор по бројот на освоени гласови е Аркин Јахиј од Националната алијанса за интеграција (НАИ) со 2.152 гласа (28,45%), а по него следува Јакуп Хусеини од Коалицијата ВЛЕН со 1.528 гласа (20,20%).
Кандидатот на СДСМ и Коалицијата за предвремени избори за градоначалник на Општина Брвеница 2026, Јовица Радески, освои 706 гласови (9,33%).
Кандидатите од групи избирачи, Душан Богдановски и Арифе Идризи, освоија 55 гласови (0,73%) односно 21 глас (0,28%).
Од вкупно 16.256 запишани избирачи, на овие избори гласале 7.565 граѓани, при што се обработени сите 16.247 избирачи на 24-те избирачки места.