Меѓународна полициска операција разби огромна криминална мрежа за измами со криптовалути, преку која биле испрани над 700 милиони евра. Европол соопшти дека средствата биле префрлани преку сложен систем од криптовалутни берзи, користејќи ја дигиталната анонимност за прикривање на нелегалните финансиски текови.
Акцијата, координирана минатиот месец во повеќе држави, е резултат на повеќегодишна истрага за лажни платформи што делувале во Европа и пошироко.
Илјадници жртви биле измамени преку привлечно дизајнирани платформи за инвестирање во криптовалути. Реклами со високи ветувања ги привлекувале корисниците, по што оператори од кол-центри — обучени во техники на социјално инженерство — ги убедувале да вложат уште повеќе средства. На жртвите им биле прикажувани лажни, нереални приноси за да продолжат со инвестирање. Откако средствата ќе биле префрлени, криминалната група ги присвојувала и ги перејќи преку мрежа од блокчејн алатки и различни берзи.
Првата фаза од операцијата се одвила на 27 октомври, кога биле спроведени рации во Кипар, Германија и Шпанија, по барање на француските и белгиските власти. Уапсени се девет лица под сомнение за перење пари, а запленети се средства во вредност од неколку милиони евра — 800.000 евра на банкарски сметки, 415.000 евра во криптовалути и 300.000 евра во готовина. Одземени се и повеќе дигитални уреди и луксузни часовници.
Втората фаза продолжила на 25 и 26 ноември, насочена кон маркетиншката инфраструктура што стоела зад онлајн измамата. Биле преземени мерки против компании и поединци кои креирале и пласирале лажни рекламни кампањи на социјалните мрежи. Во оваа етапа, рации спровеле полициски тимови во Белгија, Бугарија, Германија и Израел со поддршка на Европол.