Регионалната организациска единица за борба против трговијата со дрога при СВР Куманово е целосно распуштена по 11 недели од нејзиното формирање, откако беа утврдени недоволни резултати во работењето. Мерката е преземена на предлог на директорот на БЈБ, Александар Јанев, со одобрение од министерот за внатрешни работи Панче Тошковски.
Инцидектот или поточно кадровската промена уследи денеска за време на работната посета на Јанев на СВР Куманово, каде се разгледуваше состојбата со дистрибуцијата на дрога и психотропни супстанции во Куманово, Кратово и Крива Паланка. Сите поранешни членови на оваа единица се испратени на други работни места, а нивните позиции ги преземаат нови службеници. По повод овие мерки, Јанев испрати јасна порака:
- „Во борбата против криминалот нема простор за работа само на хартија. Потребни се конкретни акции, откриени сторители, запленета дрога и разбиени криминални мрежи. Кога резултатите изостануваат, следува одговорност, без изговори и привилегии“, порача тој, најавувајќи дека слични чекори ќе следат и во иднина при секое констатирано неработење.