Албанскиот премиер Еди Рама упати критики кон организаторите на синоќешните демонстрации во Тирана, обвинувајќи ги дека на протестот донеле учесници од Приштина и Тетово.
Рама ги нарече учесниците „жртви на политички карвани“ и оцени дека протестот бил организиран со политички мотиви.
-„Албанците од Северна Македонија не се дијаспора на Албанија на туѓа територија. Заедно со Македонците, тие се составен народ во својата земја. Дијаспората се емигранти кои живеат во странски земји, а не тие, ниту Албанците од Косово, кои имаат своја независна држава“, напиша Рама во објава на социјалните мрежи.
Протестите во Албанија траат веќе 22 дена и се познати како „Фламинго револуција“. Демонстрациите се предизвикани од контроверзниот проект за изградба на луксузен туристички комплекс, поврзан со компанија на Џаред Кушнер, зет на американскиот претседател Доналд Трамп.
Демонстрантите се противат на проектот, изразувајќи загриженост околу влијанието врз просторот и јавниот интерес, додека властите го поддржуваат како инвестиција со економски придобивки.