Албанија влегува во нова фаза на развој на својата одбранбена индустрија, најави премиерот Еди Рама, откривајќи дека земјата ќе започне со производство на оклопни возила и борбени беспилотни летала.
На традиционалната предновогодишна средба со новинарите, Рама истакна дека стратешка цел на Албанија е да го достигне просекот на земјите-членки на НАТО во делот на финансиските вложувања во одбраната.
Премиерот потсети дека во текот на годинава албанската армија е зајакната со ракетниот систем „Џавелин“, три патролни бродови добиени од Италија, како и радари за воздушен надзор, реализирани во соработка со Франција.
– „Она што останува главна амбиција, Албанија како земја што произведува воени капацитети, не е само да ги користи овие капацитети за сопствени потреби, туку и да извезува, и затоа оваа година е историска година за нашата армија, бидејќи се поставени темелите на одбранбената индустрија ‘Произведено во Албанија’“ – истакна Рама.
Тој додаде дека е формирана државна компанија, која веќе има потпишано партнерства со локални и странски компании за производство на муниција, како и за развој на амбулантни и полициски патролни возила.
– „Ќе произведуваме борбени дронови, а ќе произведуваме и системи против дронови, а првите нарачки се веќе направени. Во првите шест месеци од 2026 година сигурно ќе ги видите првите производи, додека ние продолжуваме да работиме на реализација на други договори за поморската индустрија и воздухопловната индустрија“ – рече тој.
Рама нагласи и дека Албанија денес е меѓу земјите со највисок капацитет за кибер одбрана, што дополнително ја зајакнува безбедносната позиција на државата во рамки на НАТО.