Претседателот на Владата, Христијан Мицкоски, денеска присуствуваше на пуштањето во употреба на реконструираниот Градски базен во Кавадарци.
За време на посетата, премиерот посочи дека овој спортско-рекреативен центар има регионално значење за целиот крај.
„Повторно сме во Кавадарци. Минатиот пат кога бев тука пред десетина дена почнувавме проект, сега пуштаме во употреба проект. Овој спортско-рекреативен центар мислам дека има регионално значење и е добар, да не речам, одличен“, истакна Мицкоски.
Тој потенцираше дека од целосно запуштен објект, просторот е трансформиран во функционална содржина за најмладите.
„Од целосно запуштен објект, којшто сведочеше на едно лошо време, денеска гледаме како добива смисла и добива содржина и многу сум среќен што можам да видам како нашите најмлади, дечињата уживаат во ова коешто за нив го правиме во суштина“, посочи премиерот.
Мицкоски упати благодарност до градоначалникот, пратениците од регионот, советниците, општинската администрација и министерот за спорт за нивниот ангажман.
Тој нагласи дека тековниот инвестициски бран содржи повеќе од 1.200 проекти ширум земјата кои имаат за цел да го променат ликот на населените места.
„Така што, ние продолжуваме да работиме и продолжуваме да го исполнуваме ветеното, бидејќи тоа е нашата цел и тоа е нашата задача како политичари“, заклучи Мицкоски.