Close Menu

    (ВИДЕО) Пукање врз автобуси со аргентински навивачи по натпреварот меѓу Насионал и Тигре

    2 Mins Read

    Враќањето на навивачите на аргентинскиот фудбалски клуб Тигре од натпреварот во рамките на Копа Судамерикана во Уругвај беше означено со сериозен оружен инцидент.

    Автобуската колона со која патувале навивачите била цел на оружен напад во кој е ранет 57-годишен маж, а инцидентот се случил набрзо по нивното заминување од стадионот во Монтевидео.

    Иако првичните информации говореа за две повредени лица, клубот и аргентинските медиуми потврдија дека е рането едно лице, кое е погодено во раката и шаката, но се наоѓа надвор од животна опасност.

    Нападот уследил по убедливата победа на Тигре против уругвајскиот клуб Насионал со резултат 3:0 во рамките на првиот натпревар од шеснаесетфиналето.

    Колоната од петнаесетина автобуси со повеќе од 2.000 аргентински навивачи била пресретната на една од клучните раскрсници, каде што напаѓачи на мотоцикл прво ги гаѓале возилата со камења, а потоа испукале десетина куршуми.

    Ранeтиот навивач раскажа дека во моментот на пукањето бил во автобусот заедно со својата ќерка и веднаш реагирал за да ја заштити со сопственото тело:

    „Ги изгаснаа светлата во автобусот за луѓето да можат да спијат. Низ прозорецот видов блесок и веднаш сфатив дека пукаат. И кажав на ќерка ми да легне на подот, а јас се фрлив преку неа. Тогаш еден куршум ме погоди во раката, а друг ми го уништи палецот на левата шака.“

    Уругвајските медиуми изразуваат сомнеж дека зад нападот стојат хулигански групи поврзани со поразениот клуб Насионал, но сторителите сè уште не се официјално идентификувани.

    Управата на Клуб Атлетико Тигре најостро го осуди ваквиот чин на насилство, а реванш натпреварот во Аргентина веќе е прогласен за средба од висок ризик.