Локалните избори во 2025 година ќе останат забележани како избори со историски најнизок одѕив на гласачите од независноста на државата. Првпат излезноста беше под 50 отсто во двата круга.
Според податоците на ДИК, во првиот круг гласале 48.30% од избирачите, а во вториот круr, според првичните податоци, само 41,24%.
Ова е продолжување на трендот на постојан пад на излезноста што се бележи од 2013 година, кога е регистриран и најголемиот одѕив. Тогаш во првиот круг гласале 67%, а во вториот 65%.
Веќе во 2017, излезноста во прв круг падна на 60% (втор 52%), а во 2021 на 50,57% (втор 50,69%), за сега да се спушти на 48,30% и 41,24%.
Во вториот круг од овие избори, најголема излезност има во Росоман (79,68%) и Лозово (77,85%), додека најмала е регистрирана во Куманово (35,70%) и Шуто Оризари (32,03%).
Излезноста за градоначалник на Скопје во вториот круг била само 35,33 проценти. Најголем одѕив во главниот град имало во Карпош (50,52%) и Центар (47,59%), каде исто така се гласаше за општински градоначалник, додека најниска излезност има во Сарај (12,27%) и Чаир (14,15%), каде се гласаше само за градоначалник на Град Скопје.
Поради ниската излезност, во четири општини не беше постигнат потребниот цензус од една третина од запишаните избирачи. Станува збор за Гостивар, Центар Жупа, Маврово и Ростуше и Врапчиште, каде ќе се спроведе нова изборна постапка во рок од 60 дена.
На овие избори имало вкупно 309 кандидати за градоначалници, што е благо зголемување од 2021 година (299). Најмногу кандидати (683) имало на првите избори во 1996 година, а најмалку (257) во 2017 година.