Во рамките на првото пријавување за упис во средните училишта за учебната 2026/2027 година, од вкупно пријавени 15.075 ученици преку електронскиот систем, во првиот рок успешно се запишале 13.397 средношколци.
Официјалните податоци на Министерството за образование и наука (МОН) покажуваат дека според јазикот на наставата, 9.813 ученици се запишани на македонски јазик, 3.357 на албански, 213 на турски и 14 ученици за настава на српски јазик.
Гледано по структури, во гимназиското образование се запишани вкупно 4.278 ученици, додека во стручните насоки во јуни се запишале 8.910 ученици, на сите три наставни јазици. Во уметничкото образование (музичка уметност) се запишале 209 ученици, додека за ликовната уметност во тек е процесот на селекција.
Поради пополнување на местата, конкурсот веќе е комплетно завршен во повеќе скопски и републички гимназии („Јосип Броз Тито“ – Битола, „Георги Димитров“, „Раде Јовчевски Корчагин“, „Никола Карев“ – Скопје, како и во училиштата во Делчево и Пробиштип), но и во бројни стручни дефицитарни сектори во триесетина средни училишта низ државата.
Во училиштата каде што ранг-листите покажале поголем број кандидати со идентични бодови, ќе се организира квалификациско тестирање, што веќе е потврдено за СМУГС „Д-р Панче Караѓозов“ во Скопје.
„Оваа учебна година беше потребно квалификациско тестирање во секторот здравство и социјална заштита, за квалификацијата фармацевтски техничар на албански наставен јазик во СМУГС „Д-р Панче Караѓозов“ – Скопје. Учениците ќе полагаат квалификациски испит по биологија и хемија, согласно наставната програма по биологија и хемија од осмо и деветто одделение, кој ќе се организира на 22 јуни 2026 година во истото училиште. Конечните ранг листи со резултатите за учениците кои ќе полагаат квалификациско тестирање ќе се објават истиот ден, на јавно место во училиштето и/или на училишната интернет страница“, се наведува во објавата на МОН.
За сите неисполнети места, второто пријавување на учениците ќе се реализира електронски на 23 јуни, а за него преостануваат слободни вкупно 11.882 места.
Доставувањето на документите во училиштата ќе биде на 24 јуни, а ранг-листата со дефинитивните резултати од овој круг ќе биде објавена на 25 јуни до 12 часот.