Земјоделците од северна Грција претпладнево со трактори, автобуси и земјоделски возила се упатија кон пристаништето во Солун, каде што планираат симболична неколкучасовна блокада.
Поради концентрацијата на демонстрантите во градот, се очекува граничните премини Евзони (Богородица) и Ники (Меџитлија) кон Македонија да останат отворени, барем додека трае протестот на пристаништето.
Сепак, неизвесноста продолжува. По завршувањето на собирот во Солун, земјоделците ќе одржат состанок на кој ќе се одлучи дали во текот на денешниот ден повторно ќе бидат спуштени рампите на граничните премини.
Главната блокада во земјата останува активна во централна Грција, кај Никеа (близу Лариса), каде автопатот Солун – Атина е целосно затворен, а возила се пренасочуваат по споредни патишта.