Професорот од Машинскиот факултет во Скопје, проф. д-р Дарко Данев, ја поднесе својата кандидатура за ректор на Универзитетот „Св. Кирил и Методиј“ за мандатниот период 2026 – 2029 година. Со богато академско и менаџерско искуство, Данев влегува во трката со визија за модерен и меѓународно конкурентен универзитет.
Данев, кој два мандата (2016 – 2023) успешно раководеше со Машинскиот факултет, во својата биографија бележи значајни реформи, вклучувајќи вработување на 47 нови кадри и решавање на имотно-правниот статус на факултетот. За време на неговиот мандат беше решен и горливиот просторен проблем на ФИНКИ преку отстапување објект за времено користење.
Во фокусот на неговата програма се студентите, дигитализацијата и поврзувањето со индустријата. Како декан, тој веќе воведе иновативни стипендии за најдобрите бруцоши и работеше на инклузивноста на факултетот.
Професорот Данев својата мотивација ја сублимира во слоганот: Од „УКИМ – набљудувач“ до „УКИМ – создавач“.
„УКИМ има капацитет да биде двигател на развојот на државата. Мојата цел е да изградиме универзитет кој ќе биде препознатлив по знаење, иновации и вредности, и кој ќе ги задржува и развива најдобрите млади кадри“, истакнува Данев во својата кандидатура.
Со меѓународно искуство стекнато во Шведска, Германија, САД и Јапонија, Данев ветува унапредување на квалитетот на наставата и поголема поддршка за младите истражувачи на најстариот универзитет во земјава.