Во судницата во затворот „Идризово“ денеска продолжува судскиот процес за катастрофалниот пожар во кочанската дискотека „Пулс“, во кој животот го загубија 63 лица, а над 200 беа повредени. Оваа фаза од судењето е фокусирана на изведување на материјалните докази предложени од Јавното обвинителство.
Трагедијата се случи на 16 март 2025 година за време на настап на групата „ДНК“. Претходното рочиште го одбележа сведочењето на директорот на Институтот за судска медицина, д-р Александар Станков, кој ги презентираше обдукциските наоди за причините за смртта кај жртвите.
„Јаглероден моноксид: Главна причина за смртта кај жртвите е насилно задушување со овој токсичен гас“, стои во наодите на Судска медицина.
Вештачењето покажа дека кај дел од жртвите е пронајден и водороден цијанид, кој го забрзал труењето, а регистрирани се и терминални оштетувања на дишните патишта од врелиот воздух. Дополнителен фактор за трагичниот исход бил хаосот и стампедото при обидот да се напушти објектот.
Процесот се соочува и со процедурални пречки. Поради недостапност на сведоците Дарио Трифунов и Александра Пепеларовска, во судницата беа прочитани нивните претходни искази. На ова реагираше одбраната, која смета дека тие се клучни сведоци за тоа како била внесена пиротехниката и како биле поставени прскалките.
Судот го одби барањето на одбраната на првообвинетиот Дејан Јованов за затворање на судењето за јавноста. Бранителката тврдеше дека има закани по неговиот живот, но судот оцени дека такви закани досега не биле официјално заведени.
Процесот го води судијката Дијана Груевска-Илиевска, а обвинението го застапува тим од дури 15 јавни обвинители.