Тајни СМС пораки и вибер комуникации со полициски началници, инспектори и вработени во секторот економија кои праќале дојави за контроли денеска беа јавно разоткриени во импровизираната судница во затворот „Идризово“.
Обвинителството презентираше докази од екстракција и анализа на телефонската комуникација од мобилните телефони на првообвинетиот Дејан Јованов Деко и неговиот син Михајло Јованов, во процесот за страшниот пожар во кочанската дискотека „Пулс“ каде згаснаа 63 животи.
Во судницата се читаа пораки со контакти како што биле запишани во телефонот: Началничка Марија, Цеце, Тодор Јованов, Весна Инспекторка приватен, Лазе Жти, Ацо командант, Магдалена Лиценца, Вики економија и Благица Диско, кои откриваат како сопственикот бил уредно потсетуван и предупредуван.
Особено драматична е комуникацијата од самиот ден на трагедијата, 16 март 2025 година, кога синот Михаил го известува татко си дека има рација во „Булевар“ од радовишки полицајци кои не се „наши“ и дека ќе дојдат кај нив, по што бара итно празнење на дискотеката од малолетници.
Родителите на загинатите деца реагираат згрозено по ваквите докази, нагласувајќи дека јавноста за првпат слуша имиња на лица кои имале стотици контакти со сопствениците на „Пулс“ и „Класик“, а кои воопшто не се опфатени во обвинителниот акт.
Судењето, кое го води судијката Дијана Груевска-Илиевска, а го застапува тим од дури 15 јавни обвинители, продолжува со изведување на градежно вештачење, по што свои докази ќе презентира и одбраната.