Со презентација на електронски докази и документација од болничкиот систем „ХИС“, денеска во Основниот кривичен суд Скопје продолжи доказната постапка за предметот „Онкологија 2“. Во овој случај, поранешниот директор на Клиниката Никола Васев и организацискиот директор Нехад Нухи се обвинети дека преку фиктивни набавки и злоупотреби со скапа терапија го оштетиле буџетот за речиси 36 милиони евра.
Според обвинението, двајцата обвинети во периодот од 2018 до 2022 година незаконски набавувале лекови преку фиктивни тендери и присвојувале дел од терапијата. Обвинителството пред судот презентираше три цедеа со електронска документација, меѓу која ексел табели и скенирани документи со податоци за хоспитализации, медицински досиеја, финансиски пресметки и јавни набавки на терапија.
„Со ова се прикажува вкупниот вид и количина на лекови, колку е евидентирана како потрошена и од страна на кој лекар е одобрена за апликација при прием и испис“, рече јавната обвинителка.
На вака изведените докази реагираше одбраната. Адвокатката Анита Бегова, бранителка на второобвинетиот Нухи, приговараше дека се презентираат ексел табели и копии без заверка, наместо официјални финансиски документи.
„Наместо завршни сметки за финансиски податоци од УКРО, обвинителството презентира некакви ексел табели … Во најголем дел документите со во копија без печат „верно на оригинал“ и потпис, со што нивната автентичност не може да се испита, па се неподобни како доказ. Дел од документите се во електронска верзија, чија автентиност исто така, не може да се испита, ниту пак изворот од каде се обезбедени овие документи. Вакви докази не се изведуваат туку треба да се издвојат и ковертираат“, вели Бегова.
На претходното рочиште, одбраните на двајцата обвинети имаа спротивставени ставови за динамиката на судењето. Адвокатот на Васев, Боби Спирковски, побара читање само на клучните докази за да се избегне одолжување на постапката, додека одбраната на Нухи инсистираше секој доказ поединечно да биде презентиран во судница.
Покрај овој предмет, во тек е и постапката „Онкологија 1“, во која Васев и уште двајца лекари се обвинети за несовесно лекување пациенти.