Претседателот на Собранието, Африм Гаши, денеска оствари работна средба со вршителката на должност амбасадор на Соединетите Американски Држави во земјава, Никол Варнес.
На средбата беше потврдено дека двете држави продолжуваат да негуваат одлични билатерални односи и стабилно партнерство, засновано врз заеднички демократски вредности и блиска институционална соработка.
Соговорниците разменија мислења за актуелната парламентарна агенда и тековните институционални процеси, при што беше нагласена потребата од ефикасно функционирање на демократските институции, зајакнување на улогата на Собранието и продолжување на реформските процеси во интерес на граѓаните.
На средбата беше потврдена и заедничката посветеност за натамошно унапредување на стратешкото партнерство и продлабочување на дијалогот меѓу Северна Македонија и Соединетите Американски Држави.