Романската нуклеарна централа „Чернавода“ започна постапка за контролирано исклучување на својот втор реактор поради драстичниот пад на нивото на реката Дунав, соопштија од компанијата „Нуклеарелектрика“.
Според најавите, се очекува вториот реактор околу 11 часот по локално време целосно да престане со испорака на електрична енергија во националниот систем.
Од компанијата нагласуваат дека мерката се спроведува во согласност со пропишаните безбедносни процедури и ги следи хидролошките прогнози за следните денови.
Одлуката за контролирано исклучување на втората единица е донесена поради континуираниот и значителен пад на нивото на Дунав – се наведува во соопштението доставено до Букурештанската берза.
При изведувањето на постапката строго се почитуваат безбедносните стандарди и состојбата на опремата. Од „Нуклеарелектрика“ информираат дека се во постојана координација со Националниот институт за хидрологија со цел да се обезбеди максимална безбедност на централата во услови на суша.